BAGUIO CITY – Tarigagay ni Tublay Mayor Armando Lauro ti in-inut a panakaiyemplementar ti ordinansa sadiay a mangipawpawil iti panagaramat ti plastik ken styrofoam.
Sigun kenkuana, daytoy ket gaputa awan pay ti bukod nga Engineered Sanitary Landfill ti munisipyo.
Kinunana a babaen iti nasao nga addang ket makontrol ti panagado ti basura a makolkolektar iti tunggal babbarangay sadiay.
Dinakamatna a dakkel a tulong ti Material Recovery Facility sadiay Tublay ngem impettengna met a nasken a matutukan dagiti residual wastes.
Nailanad iti nasao nga ordinansa ti munisipyo a naaprobaran idi pay 2012 a maiparit ti panaka-aramat dagiti plastic bags ken styrofoams iti entero a munisipyo.
Innayon pay ti mayor a babaen iti nasao nga ordinansa ket magun-odda ti ecological balance ken healthy environment iti munisipyo dagitoy.
Sagudayen ti Republic Act 9003 wenno Ecological Solid Waste Management Act of 2000 a kasapulan a mangisayangkat dagiti munisipyo iti bukodda a programa para iti panakaimanehar ti basura dagitoy.
