BAGUIO CITY – Maisayangkat ita nga aldaw ti inspeksion kadagiti mabalin a maaramat a playing venues iti maangay a Batang Pinoy National Finals ditoy siudad ti Baguio.
Iti panakiyuman ti Bombo Radyo kenni City Sports Coordinator Gaudencio Gonzales, kinunana a simmangpet idi malem kalman ditoy siudad dagiti opisyales ti Philippine Sports Commission (PSC) para iti nasao nga inspeksion.
Dinakamatna a paset daytoy ti panagsagana ti siudad ken ti PSC para iti nasao nga aktibidad a maangay inton September 15 agingga 21.
Immuna metten a kinuna ni Mayor Mauricio Domogan nga impaay ti PSC iti siudad ti hosting iti Batang Pinoy National Finals kalpasan a nakitada ti kinasagana ti Baguio a mang-host iti large-scale national sporting events ken iti potensiyal daytoy kas maysa nga sports hub.
Sigun kenni Gonzales, adu nga ay-ayam ti pagbabalubalan dagiti atleta iti nasao a torneyo isut gapuna nga isagsaganada a naimbag dagiti paka-ay-ayaman dagitoy.
Dinakamatna nga addan ti naisayangkat nga inspeksion kadagiti dadduma a playing venues ditoy siudad, dua a bulan ti napalabas.
Innayonna a kumpirmarenda inton bigat no dagiti irekomendarda a playing venues ket makapasa iti standard ti komisyon tapnu suratanda metten dagiti mapili a disso para iti panakaipakada dagitoy.
Mapalagip a ti Philippine Youth Games – Batang Pinoy ket isu ti national youth sports competition dagiti atleta iti pagilian nga agtawen ti 15 nga agpababa.
