BANGUED, ABRA – Imbinglay ti Commission on Elections a bumarbara ti sitwasyon idiay Bangued, Abra kagiddan ti umadanin nga eleksyon.
Iti interview ti Bombo Radyo, kinuna ni Reyman Solbita, Election Officer ti COMELEC-Bangued, tunggal lawas ket makaaw-awat ti opisinada iti insidente ti kinaranggas ngem impettengna a kasapulan a tingitinginda pay nu dagitoy ket adda pakainaiganna iti 2025 miderm elections.
Inaklon ni Atty. Solbita nga adda ti napasamak nga ambush idiay Sitio Palicad, Poblacion Pilar, Abra a nangitunda iti ipupusay ti dua nga indibidual.
Karaman iti nasao nga insidente ti grupo ti maysa a kandidato iti 2025 midterm elections.
Malaksid iti dayta, inaklon pay ti nasao nga opisyal nga adda ti naipurwak a granada iti sangwanan ti maysa a bangko idiay Magallanes Street, Barangay Zone 5, Bangued Abra itay nabiit.
Dinakamat ni Atty. Solbita a mabalin a maibilang dagitoy kas election-related violence.
Iti baet daytoy, kinuna ti nasao nga election officer nga awan pay met ti naobserbaranda a presensiya dagiti private armed groups idiay Bangued, Abra.
Kabayatanna, nakailista ti COMELEC-Abra iti maysa a kaso ti gunban nga iti agdama ket sumangsango iti kaskenan a kaso.
