Balligi ti naisayangkat nga inspection wenno panagsukimat ti Police Regional Office Cordillera kadagiti parapubliko a terminal iti siudad ti Baguio idi laeng kalman.
Daytoy ket babaen ti panangidaulo ni Police Regional Office Cordillera Regional Director Police Brigadier General David Peredo Jr ken Baguio City Police Office City Director Police Colonel Ruel Tagel.
Nangrugi ti inspection iti agarup alas dos agingga alas kuatro ti malem.
Karaman kadagiti nasukimat ket ti bus ken van terminal iti slaughter compound idiay Magsaysay, bus terminal idiay Governor Pack Road, ken bus terminal idiay PNR.
Panggep ti nasao nga inspeksion a maipasigurado ti kinatalged dagiti biaheros kagiddan ti panagrambak ti All Saints Day ken All Souls Day.
Sigun kenni PROCAR Regional Director Police Brigadier General David Peredo Jr., nasayaat met ti panagsukimatna kaduana dagiti padana a pulis iti nasao a terminal.
Kinuna ni Police Brigadier General Peredo Jr. a ti kangrunaan a sinukimatna ket dagiti driver, nu dagitoy ket nasayaat ti kondisionda nga agmaneho.
Maibasar gamin iti rekord a dinakamat ti nasao nga opisial, kadawyan a “drivers error” ti kangrunaan a rason ti aksidente idi naglabas a panawen.
Kabayatanna, dumanon iti nasurok 1,200 a kameng ti pulisia ti naideploy iti nagduduma a disso a kas iti sementerio ken terminal para iti panagrambak ti All Saints Day ken All Souls Day ita nga aldaw.
Malaksid iti dayta, adda pay ti walo gasut manipod iti force multipliers, ken nasurok pito gasut manipod iti uniformed personnel a kas ti Philippine Army, BFP, ken dadduma pay a supports group.
