BAGUIO CITY–Imbilin ni Mayor Mauricio Domogan ti panang-inspeksion ti City Market Superintendent Office ken ti Health Sanitary Office iti merkado publiko tapno maipanamnama ti kinadalus ti aglawlaw ken mamonitor pay dagiti vendors sadiay.
Sigun kenkuana, sumagmamano kadagiti vendors sadiay nangruna iti paset ti wet section ti agibelbelleng iti basurada kadagiti kanal.
Kinunana a dagiti rugit a naipisok kadagiti kanal sadiay ti mangipapaay iti nabangsit nga aglawlaw ken no saanda a maikkat ket a mangitunda dagitoy iti panakabara ti kanal nangruna no panagtutudo.
Kabayatanna, dinakamat pay ti mayor nga adda ti naawatna a reklamo dagiti konsyumer kontra iti lechon section partikular ti panakailako sadiay dagiti nalaes wenno dagiti nabayagen a lechon.
Gapu iti daytoy, impettengna a rumbeng a maipatungpal ti inspeksion iti kalidad dagiti mailaklako sadiay merkado publiko tapno maipanamnama a dagitoy ket nalangto wenno sadiwa a gatangen dagiti konsyumer.
