BAGUIO CITY – Naiyunay-unay manen ti panagsurot dagiti amin a drivers ken operators dagiti parapubliko a lugan iti minimum public health standards kontra iti COVID-19 iti uneg ti lugan dagitoy tapno maliklikan ti panakaiyakar ti nasao a sakit.
Sigun kenni Land Transportation Franchising and Regulatory Board – Cordillera Regional Director Lalaine Sobremonte, dumanonen iti tallo a panaginspeksion ti impatungpalda kadagiti paradaan dagiti parapubliko a jeep.
Kinunana a ditoy a nakitada a man-mano laeng dagiti drivers ken operators a saan a sumursurot kadagiti pito a pagalagadan a nasken a maimplementar iti uneg ti lugan dagitoy.
Kagiddan iti daytoy, impettengna manen a nasken a nalinis ti uneg ti jeep, addaan kadagiti plastic barriers ken nasken nga addaan dagitoy ti alcohol.
Inyulit pay ni Sobremento a mapatawan iti pannusa dagiti makita nga aglabsing kadagiti naituding a pagalagadan kadagiti jeep kontra iti COVID-19.
Innayonna a nasken met a nasken a nalawag ti detalye dagiti reklamo kontra kadagiti parapubliko a lugan a naglabsing kadagiti pagalagadan kas iti plaka tapnu direkta a maaksionan.