BAGUIO CITY – Maipatungpal ti madagdagus nga inspeksion kadagiti sewer lines ditoy siudad ti Baguio.
Sigun kenni Mayor Mauricio Domogan, nabayagen a nagtutulagan dagiti stakeholders ti Salaknib ti Waig Program ti lokal a gobyerno ti panakaipatungpal ti nasao nga addang.
Kinunana a makipaset iti nasao a panag-inspeksion ti inspection team ti Environmental Management Bureau-Cordillera.
Sigun kenkuana, nainget a nabilin ti panakairikep wenno panakapullat dagiti sewer lines a nakadirekta kadagiti waig nangruna iti Balili River.
Innayonna a saan laeng a dagiti commercial buildings ti maipasidong iti inspeksion ngem uray dagiti residential buildings wenno babbalay.
Maipalagip a dagiti stakeholders ti Salaknib ti Waig Program ti lokal a gobyerno ti Baguio ket bukbuklen dagiti nagduduma a pribado nga organisasyon ken ti gobyerno nga addaan panggep mangdalus kadagiti pagnaan ti danum wenno dagiti karayan iti siudad ken kadagiti kabangibang a munisipyo iti Benguet.
