BAGUIO CITY – Agtultuloy ti panagrikos dagiti mangbukbukel iti inspection team ti Baguio kadagiti nagduduma a babbarangay ditoy siudad tapnu makita ti panagtungpal dagiti residente kadagiti maipatpatungpal a paglintegan tapnu maliklikan ti panagwaras ti COVID-19.
Iti interview ti Bombo Radyo Baguio kenni Benjamin Macadangdang, executive assistant for barangay affairs ti lokal a gobyerno ti Baguio, kinunana a karaman kadagiti kadwada nga agrikrikos ket dagiti personnel ti Public Order and Safety Division.
Dinakamatna a partikular a turturongenda dagiti disso ditoy siudad a kadawyan a mairekreklamo babaen iti text message, partikular ti panagruar dagiti tattao iti kalsada a saan a naka-facemask ken ti panagu-urnong dagitoy kadagiti saan nga otorisado a pagu-urnongan.
Linawlawaganna a ti lima a purok ti Irisan Barangay a naballaagan iti lockdown ket nakitaan idi kalman iti panaglabsing kadagiti pagalagadan kas iti panagsuot iti facemask.
Dinakamatna nga iti kanito a saan latta nga agtungpal dagiti maseknan a residente iti agingga maikatlo a gundaway ket irekomendardan ti panangi-lockdown ni Mayor Magalong kadagiti nasao a purok.