Ad-adda a nainget iti lokal a gobierno iti siudad ti Baguio iti inspeksyon kadagiti establisimiento iti taraon ken danum gapu iti panagngato kadagiti kaso iti acute gastroenteritis (AGE) ken dadduma pay a sakit a maal-ala iti kontaminado a taraon ken danum, sigun iti City Health Office idi Biernes.
Sigun kenni City Health Officer Dr. Celia Flor Brillantes, dumanon iti 163 ti nairekord a kaso iti AGE kadagiti komunidad, bayat a 332 pay a kaso manipod kadagiti ospital ti maberberipikar.
Maibasar iti report dagiti sentinel hospital, ngimmato metlaeng dagiti kaso iti bloody diarrhea iti 42 manipod Enero agingga Hulio iti agdama a tawen, nu idilig iti 26 iti kapada a panawen idi 2025. Sangapulo ken lima met ti kaso ti nairekord idi Hunio ken Hulio laeng.
Agtaltalinaed met a lima ti nairekord a kaso iti cholera manipod Enero agingga Hulio, kapada iti bilang idi napalabas a tawen.
Nasurok doble met dagiti kaso iti rotavirus, manipod iti 160 idi Enero agingga iti Hulio 2025 ket nagbalin a 331 iti kapada a panawen iti agdama a tawen.
Iti pakabuklan a bilang, 84 ti nairekord idi Hunio ken Hulio laeng.
Kabayatanna, ngimmato metlaeng dagiti kaso iti typhoid fever iti 125 iti agdama a tawen manipod iti 73 iti kapada a panawen idi 2025. Manipod idi Hunio agingga Hulio, dumanon iti 52 dagiti kaso nu idilig iti 35 idi napalabas a tawen.
Sigun iti City Health Office, awan met ti nairekord a pimmusay gapu iti AGE, bloody diarrhea, cholera, wenno rotavirus idi tawen 2025 ken 2026.
Ginuyugoy ni Dr. Brillantes dagiti umili a pagtalinaeden ti umno a kinadalus, aginom iti natalged ken nadalus a danum, ken suroten ti umno a sanitation tapno maliklikan ti panagwaras dagiti sakit gapu iti kontaminado a taraon ken danum.
Binallaaganna metlaeng dagiti makapadpadas kadagiti sintomas a kas iti panagtakki, panagbakwar, wenno panagsakit iti tian a dagos nga agpakonsulta iti kaasitgan a district health center.
Imbilin metlaeng iti lokal a gobierno iti siudad iti Environmental Health and Sanitation Division a paingten ti inspeksyon kadagiti establisimiento, nangruna dagiti mangipilpila iti taraon ken mainum.
Sigun iti lokal a gobierno, nangiruar metlaeng daytoy kadagiti closure order kontra kagiti establisimiento a dua a daras a napaay iti panagsukimat iti kalidad iti danum.