BAGUIO CITY – Ibilbilang ti maysa a college instructor a dakkel a bendisyon a nakapasa daytoy iti 2017 Bar Examinations nangruna ta daytoy ti umuna a panakipasetna iti eksaminasyon.
Iti panakipatang ti Bombo Radyo Baguio kenni Atty. Rashid Lokines, kinunana a nalaos ti ragsakna gaputa naaddaanen daytoy iti titulo iti tawenna a duapulo ket pito.
Kinunana a dakkel a karit kenkuana ti panagadalna iti abogasya gapu kadagiti napasaran a panakaloko ti pamilya daytoy.
Imbingayna a kalpasan ti panagturposna iti kolehiyo ket nagtuloy daytoy a nagala iti Masters Degree ken dagus a nagisuro iti Benguet State University.
Inaklonna nga uray addan ti natalged a panggedanna ket nangato latta ti arapa-apna nga agbalin nga abogado tapnu makatulong pay daytoy kadagiti dadduma a tattao nga agkasapulan iti serbisyo legal.
Imbinglayna a dakkel a sakripisyo ti inaramidna tapnu malpasna ti uppat a tawen nga abogasya kagiddan iti panagisurona iti pagadalan ken iti responsibilidadna iti pamilyana partikular ti dua nga annak daytoy.
Kabayatanna, kinunana nga awan pay ti panggepna a pumana iti pagisursurwanna nga unibersidad gaputa agtaltalinaed a passion kenkuana ti panagsurona nangruna iti tay-ak ti agrikultura.
Ni Atty. Lokines ket tubo ti Kayapes, Kapangan, Benguet.
