BAGUIO CITY – Nabukelen ti inter-agency task force ti Baguio a mangipatungpal iti inspeksion ken panagwanawan kadagiti mairekreklamo a pagtaraknan ti baboy kadagiti babbarangay ditoy siudad.
Nailanad iti pammilin ni Mayor Mauricio Domogan nga adda ti pagkasapulan para iti panakabukel ti nasao a task force tapnu adda ti aginspeksion ken agaramid ti rekomendasyon tapnu maprebentaran ti panakasabidong ti angin ken danum gapu kadagiti nasao a pagbaboyan.
Naipaayan ti task force on piggeries iti 90 nga aldaw tapnu agsumitir iti komprehensibo a report nga agserbi a basaran ti mayor iti panakaaramid dagiti kaskenan nga aksion kontra kadagiti nasao a pagtaraknan dagiti baboy iti nagduduma a paset ti siudad.
Dinakamat ti mayor a nupay kangrunaan a pagbiagan ti adu nga umili iti siudad ti back yard piggery, mangituntunda met dagitoy iti panagreklamo dagiti apektado nga umili gapu iti panakasabidong ti angin ken danum ken iti naangot nga angin nga agtataud kadagitoy.
Nagbalin pay daytoy nga aksion ti lokal a gobyerno kalpasan a kinuna ni Environmental Management Bureau – Cordillera regional director Reynaldo Digamo a kasapulan nga agaksion ti lokal a gobyerno tapnu maprebentaran ti panag-adu dagiti pagbaboyan kadagiti residential areas iti nagduduma a paset ti siudad ken maksayan ti polusyon kadagiti waig ken karayan.
Immuna iti daytoy, binigbig ti ahensia a ti operasyon ti backyard piggeries ti maysa kadagiti kangrunaan a pollutants iti water system ti siudad.