BAGUIO CITY – Nakalukat ti Baguio iti posibilidad a mailukat manen dagiti inter-regional routes paturong ken paruar iti siudad.
Nupay kasta, kinuna ti mayor nga awan pay ti nakiuman kadakuada para iti panaglukat ti dadduma a ruta kas iti Ilocos Sur, La Union ken dadduma pay a lugar.
Kinunana nga iti baet daytoy ket interesado met ti lokal a gobyerno ti Baguio a makitaripnong kadagiti maseknan a lokal a gobyerno no adda man ti interesado para iti daytoy.
Inlawlawagna met a nasken a point-to-point laeng ti biahe kas maitunos iti pagalagadan ti panakaipasidong ti siudad iti Alert Level 3.
Impettengna a saan laeng a basta-basta nga agpick-up dagiti bus ti pasahero gaputa nasken a dumalan dagitoy iti umno a proseso.
Inyunay-unayna nga in-inot a mailukat ti siudad kadagiti turista ken mailukat metlaeng kadagiti inter-regional routes la ketdi maimaton a naimbag ti sitwasyon ti siudad iti COVID-19.
Inlawlawagna pay a nasken nga in-innot ti panaglukat ti siudad tapno saan a mapasaran ti killaat a panagngato manen ti kaso ti COVID-19.
