Binabalaw ni Mamamayang Liberal Party-list Representative Leila de Lima ti agparparang a panangsalaknib ni Senator Rodante Marcoleta iti interes ti China iti mapagsusuppiatan a West Philippine Sea(WPS).
Patien ni de Lima a kankanunungan ni Senator Marcoleta ti China gapu ta imbes a tumakder para iti Pilipinas ket iparparangarangna ti suportana iti nasao nga East Asian country.
Kagiddan dayta, impeksa metlaeng ni de Lima a saan a nasdaaw daytoy iti nagbalin nga alyas ni Marcoleta a Tsinador manipod kadagiti daduma a Pilipino ken kadagiti daduma a kakadwana iti Senado.
Supsuportaran metlaeng daytoy ti mapangpanggep a panakaipatungpal ti friendly debate iti nagbaetan da Senator Marcoleta ken sigud a Supreme Court Associate Justice Antonio Carpio tapno ad-adda pay a mapalawa ti panakaammo kadagiti banbanag maipapan iti West Philippine Sea (WPS) ken tapno makita nu siasino ti pudno nga addaan iti panagayat ken panangipateg iti Pilipinas.
Maipalagip a bimmara ti diskusyon maipapan iti isyu ti West Philippine Sea (WPS) gapu iti panangbabalaw iti China kadagiti impablaak ni Philippine Coast Guard Commodore Jay Tarriela iti social media account daytoy a mangipakpakita kadagiti agresibo a tignay iti China Coast Guard(CCG) kadagiti Pilipino iti nasao a paset ti mapagsusuppiatan a teritoryo.
Sakbay dayta ket nabara metlaeng a mapagsasaritaan nu anya a pagilian ti pudno nga adda karbenganna iti daytoy.
Mainaig iti dayta, pabor metlaeng ni de Lima a sangwen ni Carpio ni Marcoleta tapno matalantan ti karbengan ti Pilipinas iti West Philippine Sea (WPS).//Rob
