Saan a pinatgan iti Pre-Trial Chamber I iti International Criminal Court (ICC) ti nakiddaw nga interim release ni sigud a president Rodrigo Duterte.
Sigun iti Pre-Trial Chamber I, agtaltalinaed a napateg ti panakaibalud ni Duterte tapno masigurado ti panakidar-ay daytoy iti panagdengngeg nangruna ket agingga iti agdama, patien dagiti Duterte a ti panakaarestar ti sigud a presidente ket maysa a kidnapping.
Maysa pay a rason iti nasao a chamber tapno saan a patgan ti interim release ni FPRRD ti silulukat a panangipeksa iti kritisismo ti pamilya daytoy seknan iti panakaarestar ken panakaibaludna kasta metten ti kidkiddawen dagitoy panakaiyawidna iti Pilipinas.
Malaksid iti dayta, maysa pay a mangsupsuporta iti desisyon iti chamber ti panangipeksa metlaeng ti sigud presidente iti gagarna nga agsubli idiay Davao City apaman a maipaayan iti interim release— banag a salungasing iti kinuna ti defense team daytoy nga agtalinaed iti sabali a pagilian.
Patien pay ti nasao a chamber nga adda paylaeng kabaelan ni Duterte a lapdan ti imbestigasyon, direkta wenno babaen kadagiti associates wenno kaalyadona.
