Guyguyuguyen ti International Criminal Court (ICC) dagiti indibidual nga addaan pannakaammo kadagiti krimen a naaramid bayat ti kontrobersial a war on drugs ti administrasion ni Duterte nga agturong iti tribunal a nakabase iti Hague.
Iti pablaak ti nasao a korte, kidkiddawen ti Internatational Criminal Court dagiti mabalin a saksi nga ibinglayda ti impormasion seknan iti mapapati a krimen kontra kadagiti tattao pakairamanan ti pammapatay, “torture,” ken sexual violence iti nagbaetan ti Hunio 2016 ken Marso 2019.
Umap-apela pay ti International Criminal Court kadagiti kameng ti Philippine National Police (PNP) ken dadduma pay nga ahensia a karaman iti operasion kontra iligal a droga.
Nangiyuswat pay ti korte iti website para kadagiti interesado a saksi a mabalin a mangipaay ti impormasion.
Saan a kasapulan ti website ti nagan, ngem rumbeng a maikabil ti detalye ti “contacts,” pakairamanan ti numero ti selpon ken email address.
Dagiti interesado a saksi ket rumbeng nga ipaayda ti pakainaiganda—kameng man dagitoy iti PNP, National Bureau of Investigation (NBI), Philippine Drug Enforcement Agency (PDEA), local government units, wenno biktima wenno saksi iti maysa a krimen.
