BAGUIO CITY – Temporaryo a sinuspindir ti Saint Louis University (SLU)-Hospital of the Sacred Heart ti internship dagiti estudyante ti SLU-School of Nursing gapu iti ngumatngato a kaso ti COVID-19.
Nailanad iti naiyulog a recommendation circular ti pammilin ti SLU-Hospital of the Sacred Heart – Infection Prevention and Control Committee ti panagsardeng ti rotation duties dagiti nurse-interns tapnu malapdan wenno maliklikan ti panagwaras ti COVID-19 kadagiti pasiente ken nurse-interns.
Kinunana pay ti ospital a babaen ti nasao a suspension ket maksayan ti panaggaraw ken bilang dagiti indibidual iti uneg ti pasilidad nangruna ta addan ita iti Alert Level 4 ti SLU-Hospital of the Sacred Heart.
Imbilin metlaeng ni Atty. Arnulfo Soriano, SLU-HSH Vice President for Hospital Affairs ti dagus a panakasuspendir ti internship iti Medical Laboratory Sciences Program.
Maipalagip a karaman ti nasao a pagadalan kadagiti pinalubosan ti Commission on Higher Education ken ti lokal a gobierno ti Baguio a mangipatungpal ti face-to-face classes, pakairaman ti internship classes para kadagiti thirs year wenno fourth year college students iti lokalidad.
