Nakared alert status wenno naipasidong iti Charlie Protocol ti intero a rehiyon Cordillera gapu paylaeng iti tropical storm Kristine.
Iti pannakiuman ti Bombo Radyo kenni Frankie Cortez ti Chief Operations Section iti Office of the Civil Defense-Cordillera, kinunana nga immunan a naipatungpal daytoy kas paset ti panagsaganada iti aniaman a pangta ti nasao a bagyo.
Malaksid iti dayta, nakastandby ken full alert metlaengen dagiti maseknan nga opisina para iti rescue operation iti kanito nga adda ti didigra.
Gapu iti dayta, nainget ti monitoring ken panagbantay dagitoy partikular kadagiti flood prone areas kas iti La Trinidad, dadduma a paset ti Benguet, Kalinga, Apayao ken dadduma pay.
Daytoy ket tapno masigurado ti dagus a pannakaibakwit dagiti umili iti kanito a mapasaran ti panaglayos.
Kabayatanna, impakaammo pay ni Cortez a nakailista dagitoy iti tallo a kalsada idiay Apayao a naapektaran iti bagyo gapu ta manarimaan paylaeng iti rehabilitation dagitoy rason a naitantan paylaeng daytoy gapu iti nangato a lebel ti danum kadagiti karayan sadiay.
Bambantayan metlaeng dagitoy dagiti agarup 800 a lugar iti rehiyon a karaman kadagiti flood ken slide prone area.
Gapu iti dayta, nagpalagip manen daytoy iti publiko nga agbalin nga alerto ken makikoordinar kadagiti ballaag dagiti otoridad.
