BAGUIO -Ad-adda a bumileg ken tumibker ti interoperability ti Philippine Drug Enforcement Agency (PDEA) iti pulisya, militar ken kadagiti lokal a gobyerno para iti panakaisayangkat dagiti operasyon a naan-anay a mangpaksiat iti parikut iti iligal a droga iti rehion Cordillera.
Iti interview ti Bombo Radyo Baguio kenni Director Gil Castro, baro a dadaulo ti PDEA-Cordillera, kinunana a paset daytoy ti nairtengan a kampanya kontra iti iligal a droga, kadagiti baro a drug personalities ken iti panagmula ken panagilako iti marijuana.
Dinakamatna nga iti baet a limitado dagiti personnel ti PDEA-Cordillera ket nakasaritanan ni PBGen. R’Win Pagkalinawan, dadaulo ti Cordillera Police para iti natibtibker a panagtinnulong dagitoy kadagiti operasyon.
Imbingayna a nagtulagda a dua tapnu aramidenda ti amin a kabaelanda tapnu magibusanen ti parikut iti marijuana ditoy Cordillera wenno saan ket makaaramidda iti dakkel a panagbaliw iti drug situation ti rehion.
Innayonna a daytoy ti oportunidadda tapnu agresponde iti kiddaw dagiti tattao a panakaparmek ti iligal a droga iti rehion nangruna ta agtaltalinaed ti gagar ti pulisya, dagiti lokal a gobyerno ken ti PDEA a mangpaksiat iti iligal a droga iti pagilian.
Kabayatanna, dakkel ita ti responsilibilidad dagiti punong barangay iti entero a rehion Cordillera iti kampanya kontra iti panagmula iti iligal a droga.
Kinunana a nagsaritadan kenni Police Regional Office Cordillera, regional director PBGen. R’Win Pagkalinawan seknan iti nasao a banag ken napagtulaganda ti panangadaptarda iti polisiya a ti kapitan iti barangay a nakadiskobrean ken nakadadaelan dagiti marijuana ti addaan responsibilidad a mangbigbig iti nagan ti agtagikua, mangbaybayad iti buis ken mangsuksukay iti nasao a disso wenno lugar.
Innayonna a maipabaklay iti kapitan ti nasao a responsibilidad gaputa ti kapitan ti maka-ammo kadagiti residente iti masakupan daytoy.
Sigun pay kenni Castro, no mapaay ti kapitan a mangited iti kidkiddawenda a pakabigbigan iti baet ti adu a pawayway ket kaipapananna a poprotektaran ti kapitan ti agtagikua wenno mangsuksukay iti nasao a marijuana plantation site. -GCBalegan
