BAGUIO CITY -Ad-adda a mapalawa ti investigation capability ken intelligence gathering wenno kapabilidad dagiti operatiba ti Philippine Drug Enforcement Agency (PDEA) – Cordillera nga agimbestigar kadagiti indibidual nga addaan pakainaigan iti illegal drug trade.
Iti panakiuman ti Bombo Radyo Baguio, dinakamat ni PDEA-CAR Regional Director Gil Castro a mapasamak ti nasao a banag ita a tawen.
Kinunana nga inwarasdan kadagiti provincial offices ti PDEA iti rehion ti maysa a software a maysa a teknolohiya manipud Australia a maaramat para iti nasao a ranta.
Dinakamatna a babaen iti nasao a teknolohiya ket makita ti pakabuklan a sitwasyon ti illegal drug trade iti uneg ken ruar ti Cordillera, pakairamanan dagiti contacts dagiti drug personalities iti rehion.
Innayonna a babaen pay iti nasao a teknolohiya ket mabigbig ti financial transactions dagiti personalities iti illegal drug trade a pakakitaan kadagiti indibidual a financers dagiti drug groups.
Sigun pay kenkuana, maaramat dagiti makolektar nga impormasyon manipud iti nasao a software kas ebidensia iti panakaipila ti kaskenan a kaso kontra kadagiti drug personalities.
