BAGUIO CITY- Maim-imbestigaranen ti maatap a panagkettel iti bukodna a biag ti maysa nga OFW manipud Km. 24, Caliking, Atok, Benguet a nagtrabaho sadiay Alnhada Shariah, United Arab Emirates (UAE).
Iti interview ti Bombo Radyo Baguio, kinuna ni Kevin See, Chief of Staff ni Benguet Caretaker ken ACT-CIS Representative Eric Yap a daytoy ti kaudian nga update a naawatda manipud iti Department of Foreign Affairs (DFA) seknan iti insidente.
Kinunana a nagkamang iti kongresista ti pamilya ti nasao nga OFW isut gapuna a dagusda met a nakikoordinar iti DFA.
Impasiguradona a tuttutukanda ti pakaseknan nangruna ta naawaten dagiti otoridad sadiay UAE ti letter of acceptance ken naipatulod payen dagiti dadduma a dokumento a kasapulan sadiay.
Impettengna a nasken a madusa dagiti responsable no pudno nga adda ti foul play a napasamak nangruna ta naidanun kadakuada ti posibilidad a narames ti OFW sakbay a naiduron tapnu matnag iti pasdek.
Inkarina pay a saan a sumardeng ti kongresista agingga a maipaay ti hustisya para iti pamilya ken maiyawid ti bangkay ditoy pagilian.
Immuna metten a sinarungkaran ti mammanday linteg ti pamilya ti OFW ken inkarina ti panakaipaay ti tulong iti nagannak ti OFW ken iti naulina nga anak daytoy babaen iti scholarship agingga a makalpas iti kolehio.
