![](https://img.bomboradyo.com/baguio/2020/03/Covid-19-News-Update.jpg)
BAGUIO CITY – Nangrugin ti imbestigasyon dagiti otoridad tapnu maamuan no kasano a nakastrek ditoy siudad ti Baguio manipud sadiay National Capital Region ti maysa nga opisyal ti PNP iti national headquarters a positibo iti COVID-19.
Immunan a nabigbig daytoy a ni PMaj. Rafael Baldado Roxas, 41-anyos, deputy chief ti Fingerprint Division ti PNP Crime Laboratory sadiay Camp Crame, Quezon City ken residente ti Barangay Dontogan, ditoy siudad ti Baguio nga iti agdama ket adda iti Baguio General Hospital and Medical Center.
Sigun kenni PCol. Rae Allen Co, dadaulo ti pulisya ti Baguio, naala ni Roxas ti virus iti nagtaudan daytoy a lugar ken saan a ditoy siudad.
Kinunana a maipasidong iti pre-charge investigation ti panagbiahe ni Roxas manipud Manila paturong ditoy Baguio ken no mapaneknekan a naglabsing daytoy iti quarantine laws ket maipataw ti kaskenan a pannusa.
Inkarina met ti saanda a panangbaybay-an no adda dagiti kameng ti pulisya nga aglabsing kadagiti paglintegan ti manarimaan a community quarantine.
Impettengna pay a sangwen ni Roxas ti bunga ti nagbalin nga aksion daytoy nupay iti agdama ket nasken a maipangruna ti panagrekober daytoy.
Nupay kasta, inyunay-unay ni Co nga adda met ti posibilidad a nakaptan ni Roxas iti COVID-19 bayat ti panangaramid daytoy iti mandatona kas frontliner.
Maipalagip nga impasidong ni Mayor Benjamin Magalong iti lockdown ti home barangay ni Roxas kalpasan a nakumpirmar ti kaso daytoy.
Imbingay met ni Mayor Magalong nga April 25 paylaeng nga addan ditoy siudad ni Roxas ken naduktalanna a naglibas ti opisyal ken linabsing daytoy ti quarantine rules sadiay Manila.