Impablaak ti International Criminal Court (ICC) ti pormal nga iskedyul para iti maikadua nga status conference ti kaso a sangsangwen ni sigud a President Rodrigo Duterte a crimes against humanity.
Iti impablaak ti nasao a korte a public order, naituding ti maikadua nga status conference inton Hunyo 23, 2026 manipus alas- dyes ti agsapa agingga alas-12:00 ti aldaw .
Sigun iti Trial Chamber III ti ICC, lima nga isyu ti kangrunaan a mapagtatatalantanan iti nasao a panagdengngeg pakairamanan ti:
deadline ti panangisumitir ti obserbasyon iti Expert Panel Report, panangadaptar iiti protocol iti panangigem kadagiti confidential information, limitasyon ti kinaatidog ti prosecution trial brief, panangituding iti sumaruno nga status conference kalpasan iti judicial recess, ken public statements dagiti counsel.
Innayon ti nasao nga korte a nupay maipapubliko ti nasao nga status conference, inlawlawagda a posible latta a maaddaanda iti private sessions kabayatan iti panagdengngeg nangnangruna nu mapagtatatalantanan dagiti sensitibo nga impormasyon seknan iti witness protection ken seguridad.
Kinumpirmar metlaeng ti Trial Chamber III a saan a dumar-ay ni sigud a President Duterte iti nasao a panagdengngeg kalpasan nga inwaive-na ti karbengan na nga agatendar. //bombokaren.c.sapirao
