BAGUIO CITY – Agtaltalinaed a nawaya ita dagiti isolation facilities ken dagiti Temporary Treatment and Monitoring Facilities (TTMFs) ti Benguet iti baet ti tagtultuloy a panakailista ti COVID-19 iti probinsia ken iti presensia ti Omicron variant sadiay.
Iti panakiuman ti Bombo Radyo Baguio, kinuna ni Provincial Health Officer Dr. Nora Ruiz nga adda latta dagiti bakante nga isolation facilities iti probinsya a mabalin a pakaiturongan dagiti makaptan ti COVID-19.
Dinakamatna nga adda paylaeng ti bakante a 27 isolation beds iti dua a TTMFs a masarakan sadiay Wangal, La Trinidad malaksid kadagiti 12 a pasyente nga agdama nga adda sadiay.
Kinunana a nawaya metlaeng ti bed capacity ti COVID ward ti Benguet General Hospital gaputa manipud iti 132 a kama ket 73 laeng ti agdama nga okupado.
Inlawlawagna met a kaaduan kadagiti nakaptan ita ti COVID-19 iti probinsia ket mild cases ken ti dadduma ket awanan sintomas isut gapuna a naipasidong dagitoy iti home isolation nupay nainget nga iwanwanawan dagiti health workers dagitoy.
Kabayatanna, impannakkel pay ni Dr. Ruiz nga umdas paylaeng ti suplay dagiti kangrunaan a kagawaan a kasapulan dagiti pasyente a makaptan ti COVID-19.