BAGUIO CITY – Napirmaan ti katulagan iti nagbaetan ti provincial government ti Mountain Province, ti municipal government ti Bontoc ken dagiti sumagmamano a business establishments iti nasao a munisipyo.
Paset daytoy ti kampanya tapnu manayonan dagiti agserserbi nga isolation facilities wenno Temporary Treatment and Monitoring Facilities ti Bontoc gapu iti panagngato ti kaso ti COVID-19 sadiay ken maliklikan ti panakapunno dagiti agdama nga isolation ken treatment facilities ti ili.
Naamuan a dua a business establishments a bukbuklen ti maysa nga inn and restaurant ken clinic and diagnostic center ti nagpirma iti nasao a katulagan.
Sagudayen ti katulagan a ti provincial government ti Montanyosa ti mangbayad iti dua a bulan a renta dagiti dua a pasilidad bayat a batang ti municipal government ti Bontoc ti 24-hour security, panag-disinfect ken dadduma pay a pagkasapulan.
Iti agdama, uppat a pasdek ti gobyerno ti maar-aramat kas isolation facilities ti Bontoc malaksid pay kadagiti dua a baro a pasilidad.
Naamuan a pinatganen ti DepEd ti panaka-aramat ti Mountain Province General Comprehensive High School- Senior High Building iti kapada a panggep isut gapuna a manarimaan ti panakaiproseso dagiti pagkasapulan a dokumento.
