BAGUIO CITY – Nailukat dagiti isolation facilities ti Baguio City para iti probinsya ti Benguet kagiddan iti panagngato ti kaso ti COVID19 sadiay.
Sigun kenni Mayor Benjamin Magalong, ikalkalikagumda nga agbiruk iti wagas a mangpalawa ti isolation capacity tapnu mangsolbar ti parikot seknan iti agkurkurang nga espasyo ken ngumatngato a kaso ti nasao a sakit ditoy syudad.
Nupay kasta, kinunana a silulukat latta ti syudad a mang-akseptar kadagiti pasyente manipod Benguet
Inmunan a nangipaay ti suporta ni Mayor Magalong kadagiti nagduduma a munisipyo ti Benguet tapnu mapapigsa ti testing capacity dagitoy
Malaksid kadagiti testing tools, nangibingay metlang ti syudad kadagiti personal protection equipment para kadagiti health workers ti nasao a probinsya.
Impanamnama pay ti mayor iti agtultuloy a pannakibinnadangna kadagiti dadaulo ti tunggal munisipyo ti probinsya tapnu mapatibker ti 4’Cs iti crisis management wenno iti coordination, cooperation, communication ken collaboration ti tunggal ili.