Saan nga ibabawi ti Israel dagiti puersana manipod iti nagbeddengan ti Gaza ken Egypt gaputa kasapulan iti sidong ti maikadua a paset “ceasefire” ti Hamas.
Sigun iti maysa nga opisial, saanda a rumuar iti Philadelphi Corridor, ken saanda nga ipalubos nga aggargaraw manen dagiti mammapatay iti Hamas, ken saanda nga ipalubos a papigsaenda manen ti bagida babaen ti panagpuslit.
Naipablaak ti nasao a banag kalpasan ti sumagmamano nga aldaw sakbay nga agleppasen ti Israel-Hamas hostage-ceasefire agreement dagitoy.
Iti maysa nga statement, kinuna ti Hamas a ti pannakapaay ti Israel nga umatras iti nagbeddengan ti Gaza ken Egypt ket nalawag a panaglabsing iti katulagan iti ceasefire, ken panangpadas a mang-fabricate ti rason a manglapped iti katulagan iti ceasefire.
Nupay kasta, kinuna ti opisina ti Israeli Prime Minister a nangipatuloden ni Benjamin Netanyahu iti “negotiating delegation” tapno agtuloy ti katulagan iti ceasefire.