Naituding nga agbiahe ni Israeli Prime Minister Benjamin Netanyahu idiay pagilian a Hungary iti agdama a lawas, kagiddan ti panagkedkedna iti arrest warrant a naipulog manipod iti International Criminal Court gapu kadagiti alegasion iti “war crimes” idiay Gaza.
Bayat ti panagbisita, a mangrugi inton Mierkoles ken agtultuloy agingga iti Domingo, makipagkita ni Netanyahu iti Hungarian counterpart-na a ni Viktor Orban, a nangawis kenkuana idi Nobiembre, saan a nagbayag kalpasan nga impaulog ti ICC ti arrest warrant.
Impasigurado ni Orban a ti arrest warrant iti naituding a tiempo ket saan a matungpal.
Amin a European Union member states, pakairamanan ti Hungary, ket kameng ti International Criminal Court, nu sadinno masapul nga ipatungpalda dagiti warrant.
Ti panagbiahe ni Netanyahu ket ti maikadua a panagturong iti dadduma a pagilian sipud idi impaablaak ti ICC ti warrant kontra kenkuana, kasaruno ti panagbisitana idiay Washington idi Pebrero a nakipagsinnarak kenni US President Donald Trump.
Immunan nga inladawan ti Israel nga ulbod ken “absurd” dagiti warrant kontra kada Netanyahi ken sigud a Defense Minister Yoav Gallant.