BAGUIO CITY – Maipimpinalen ti proseso para iti pannakaiyakar ti istasion ti Bureau of Fire Protection (BFP)-Baguio sadiay Camp John Hay manipud iti agdama a a lokasion daytoy sadiay Abanao Street, Baguio City.
Iti interbyu ti Bombo Radyo-Baguio ken ni Senior Fire Office IV Camilo Balancia, pannakangiwat ti BFP-Baguio, kinunana nga ur-urayenda ti pinal nga instruksion para iti pannakaiyakar ti fire station ti siudad.
Dinakamatna nga adda ti pagsayaatan ken pagdaksan ti pannakaiyakar ti fire station ti siudad.
Inlawlawagna a maysa a negatibo nga epekto daytoy ti posibilidad a marigatan ton dagiti kliyente ti opisina nangruna dagiti agala iti business permits gapu ta immaddayon ti fire station.
Nupay kasta, kinunana nga agbalin a bentahe ti kinalawa ken kinapintas ti kabarbaro nga opisina.
Mainaig iti daytoy ket dinakamat ni Balancia a saan pay a nalawag no naan-anay a maikkat sadiay Abanao Street ti fire station ti BFP wenno saan.
