BAGUIO CITY–Inakalintegan ti maysa a pribado nga ospital ditoy Baguio City ti alegasyon a mangibelbellengda iti toxic ken kontaminado a basura dagiti pasyente ti COVID-19 iti bakante a lote iti likudan ti ospital.
Sigun kenni Dr. William Occidental, Administrator Facility ti Sto. Niño Hospital, makikokoordinarda iti Department of Environment (DENR) para iti panakaidispose dagiti basura.
Dinakamatna nga adda ti bukkodda a collector a mangak-akup kadagiti basura partikular iti infectious waste a maiturturong iti sabali a rehion.
Innayuna a babaen iti napirmaan a Memorandum of Agreement (MOA) ti ospital ken ti grupo ti kolektor ket kadawyan a dua a daras tunggal lawas ti koleksion dagiti basura.
Inlawlawagna met a responsibilidad ti General Services Office a mangakup kadagiti general waste ti ospital.
Impetteng ni Occidental a saan a pudno a maiwarwara dagiti basura partikular dagiti manipud iti COVID-19 patients iti ospital.
Impaganetgena a priyoridadda ti kinadalus ti aglawlaw ti ospital nangruna ta ado dagiti naka-isolate a pasyente ti virus sadiay.
