BAGUIO CITY – Linawlawagan ni Balili Punong Barangay Billy Bilango sadiay La Trinidad, Benguet ti damag seknan iti panangpigis ken panangkumpiskar dagiti sumagmamano a pulis ti Baguio City iti quarantine passes dagiti umili ti Barangay Balili.
Iti panakaiyuman ti Bombo Radyo Baguio, kinunana a dagiti quarantine passes ket epektibo laeng agingga June 15.
Nupay kasta, napanunumuan nga agtalinaed dagiti quarantine passes ken mabalin paylaeng nga aramaten dagiti umili ti Barangay Balili iti panagturongda iti siudad ti Baguio.
Inaklonna met nga adda ti nagkuranganda gapu iti saanda a panangimpormar iti pulisya ti Baguio seknan iti nasao a desisyon.
Immunan a naiyuman kadakauda idi kalman ti panangkumpiskar ken panangpigis dagiti pulis kadagiti quarantine passes dagiti residente ti Barangay Balili.
Mamati ni Kapitan Bilango a nariro met laeng dagiti pulis gapu iti saan nga umno a petsa a naikabil iti quarantine passes.
Nupay kasta, inyunay-unayna nga agingga ita ket epektibo paylaeng ti Blue Pass Slip dagiti residente ti Barangay Balili agingga inton July 15.
Kinunana pay nga iti agdama ket makikoordinaren ti lokal a gobierno ti La Trinidad, Benguet kadagiti pulis ti Baguio City seknan iti nasao a banag.
