BAGUIO CITY – Kinumpirmar ti mayor ti La Trinidad, Benguet a ti danum ken dagdaga manipud iti land development iti deppaar ti Sitio Piripin Bato iti ngato ti Sitio Cogcoga sadiay Barangay Pico ti nangitunda iti panaglayos iti deppaar ti Km. 4 kadagiti napalpalabas nga aldaw kagiddan ti panagbayakabak ti napigsa a tudo.
Iti interview ti Bombo Radyo Baguio, kinuna ni Mayor Romeo Salda a naduktalanda ti nasao a banag iti insayangkatda nga imbestigasyon.
Inlawlawagna nga iti nasao a land development ket nagna ti danum iti kalsada ken nagtinnag iti drainage canal nga inaramid ti developer a naidiretso iti baba ti bantay, partikular iti ayan ti Calica Family sadiay Km. 4.
Kinunana a maymaysa ti nakaiturongan ti nasao a drainage canal bayat a bassit ti kanal a rimwaran daytoy sadiay Km. 4 a nangitunda iti panaglayos ti kalsada iti danum ken pitak.
Innayonna a mangisayangkat to manen dagiti maseknan nga opisina iti inspeksion iti nasao a land development apaman a sumayaat ti sasaaden ti panawen.
Dinakamat pay ni Mayor Salda a gapu iti nasao a panaglayos sadiay Km. 4 ket tallo a balay ti naapektaran bayat nga uppat a balay sadiay balili, no sadino, sinerrek dagitoy ti pitak ken danum.
Impetteng met ni Pico Punong Barangay Ramon Salda nga iligal ti nasao a land development sadiay Piripin Bato gaputa awanan daytoy ti aniaman a permit ken saanda pay nga ammo no asino ti developer sadiay.
Kinunana nga awan pulos ti naaw-awat ti barangay a kiddaw para iti permit ti nasao a konstruksion.
Sigun pay kenkuana, panggep ti municipal government ken ti barangay a padakkelan ti drainage canal sadiay Km. 4 a rimwaran ti pitak ken danum.
