BAGUIO CITY – Nagduduma nga isyu ti tinalantan ti dua a mayoralty candidate ti La Trinidad, Benguet a da incumbent Mayor Romeo Salda ken incumbent Vice Mayor Joey Marrero iti naangay a Debate sa Bombo para iti May 2019 midterm elections.
-kontrobersial nga istruktura sadiay city limit-
Mamati dagiti dua a nasken a maipasardeng ti kontruksion ti maysa nga istruktura iti asideg ti Bell Church iti paset ti Kilometer 3.
Inlawlawag ni Salda nga adda ti naipaulog a cease and desist order iti nasao a proyekto
Kinunana a maibasar iti permiso ti patrabaho ket nasken a kabite laeng ti maipatungpal sadiay saan ket a panakaibangon ti maysa nga istruktura.
Kinuna met ni Marrero a nasken a maipasardeng koma ti nasao a patrabaho gaputa nailanad iti ordinansa ti La Trinidad a nasken a madusa dagiti mangipatpatungpal iti nasao a patrabaho gapu iti panaglabsing dagitoy.
-Balili River-
Impetteng ni Marrero a nasken a makabilan iti screen ti Balili River, partikular iti batog ti Bell Church iti paset ti Kilometer 3.
Kinunana a babaen iti daytoy ket maduktalan no dagiti basura a maiturturong iti Balili River ket agtataud iti siudad ti Baguio.
Innayonna nga adda ti resolusyon nga impasa ti Sangguniang Bayan para iti panggep a panakaikabil ti screen iti paset ti Balili River tapno saanen a maiturong iti masakupan ti munisipyo dagiti basura nga agtataud iti siudad ti Baguio.
– timek ni mayoralty candidate ken incumbent La Trinidad Vice Mayor Joey Marrero
Kinuna met ni Salda nga adda dagiti grupo a nadutukan tapno regular a madalusan ti Balili River.
Kinunana a tapno marisot ti parikot iti Balili River ket adda ti maipatungpal nga imbentaryo kadagiti residente nga agnanaed iti asideg ti Balili River tapno maammuan no asino kadagitoy ti awanan iti septic tank.
– timek ni re-electionist ken incumbent La Trinidad Mayor Romeo Salda
-basura-
Impannakkel ni Salda nga agtultuloy ti panagtignayna ken ti sibubukel a pwersa ti lokal a gobyerno ti La Trinidad tapno marisot ti parikot dagitoy iti basura.
Impannakkelna a ti 10-year Solid Waste Management Plan ti La Trinidad ti kaunaan a plano para iti solid waste management a naaprobaran.
Dinakamatna a manarimaan met ti konstruksion ti panakapalawa ti Cell No. 3 ti Alno Dumpsite ken mapampanggep ti kanayonan a Cell No. 4 tapnu maisardengen ti panakaiturong dagiti basura ti La Trinidad sadiay Urdaneta City, Pangasinan.
– timek ni re-electionist ken incumbent La Trinidad Mayor Romeo Salda
Kinuna met ni Marrero a nasken a mapasayaat ti wagas ti panakaramat ti Alno Dumpsite tapno umatiddog ti panawen a mabalin a maaramat daytoy tapno saanen a maibunag sadiay Pangasinan dagiti basura ti ili.
– timek ni mayoralty candidate ken incumbent La Trinidad Vice Mayor Joey Marrero
-vegetable trading posts-
Inlawlawag ni Salda a saan a mabalin a mapwersa dagiti stakeholders ti La Trinidad Vegetables Trading Post nga agakar sadiay Benguet Agri-Pinoy Trading Center (BAPTC).
Kinunana a saan met a mabalin a maiparikep ti trading post sadiay Kilometer 5 gapu ta daytoy ti economic enterprise ti munisipyo.
Inlawlawagna pay a temporaryo a naipasardeng ti rehabilitasyon ti nasao a trading post gaputa saan pay a naipaluspos ti maudi a paset ti pondo para iti daytoy.
– timek ni re-electionist ken incumbent La Trinidad Mayor Romeo Salda
Impeksa met ni Marrero ti suportana iti panakatarimaan ti La Trinidad Vegetables Trading Post ngem kinunana a parikot ti maaramat a pondo iti agtultuloy a rehabilitasyon ti pasdek.
– timek ni mayoralty candidate ken incumbent La Trinidad Vice Mayor Joey Marrero
