BAGUIO CITY – Naipisok iti pagbaludan ti maysa a jail officer a nakemmeg iti anti-drug operations nga inyusuat ti nagtipon a pwersa ti Drug Enforcement Unit, PDEA-Cordillera, City Intelligence Unit, ken Baguio City Police Office Station 7 sadiay Father Carlo Loop, Session Rd., Baguio City idi kanikadua.
Nabigbig daytoy a ni Senior Jail Officer 2 Donald Tauli Kelly Jr., 49-anyos, nakadestino iti Itogon Municipal Jail, tubo ti Sagada, Mt. Province ken residente ti Antamok, Tram, Itogon, Benguet.
Nakumpiskar manipud iti suspek ti dua a brittle object a nabalkot iti cellophane a naglaon iti maatap a shabu, maysa a pistol holster, maysa a caliber 9mm, dua a magazine a naglaon iti duapulo ket uppat a bala, sling bag ken cellphone.
Malaksid iti daytoy ket naala pay manipud iti suspek ti P9000 boodle money ken P1000 bill genuine money.
Segun iti pulisya, nabayagen a pinalpaliiwda ti nasao a jail officer ken idi naaddaanda iti gundaway ket impatungpalda ti drug-buy bust operation a nagresulta iti panakakemmeg ti suspek.
