BAGUIO CITY–Impetteng ni Tuba Mayor Ignacio Rivera a saan a mabalin a maaddaan iti “joint” wenno maymaysa nga staging area ti basura ti siudad ti Baguio ken ti munisipyo dagitoy.
Kinunana a ti staging area dagitoy ket para laeng kadakuada.
Inlawlawagna a saanna daytoy a kankanunungan gaputa posible daytoy a mangitunda iti dakkel a parikut.
Mainaig iti daytoy, kinunana nga agingga iti agdama ket awan pay ti opisyal ti siudad ti Baguio a nagturong iti opisina daytoy tapnu pagsaritaanda ti nasao nga isyu.
Nupay kasta, kinunana nga immawag kenkuana ni City Mayor Mauricio Domogan sakbay pay a naaramat kas staging area ti basura ti Dairy Farm.
Kinunana a maawatanna ti pakaseknan ti siudad gaputa awanen ti dadduma a lugar a mabalin a pakaiturungan dagiti basura.
Nupay kasta, kinunana a nasken a saan a maapektaran dagiti residente iti masakupan daytoy a lugar ken no mabalin ket dagus a maiyakar ti staging area no adan ti sabali a lugar a nabirukan ti siudad.//at
