Nawaya-wayaan ni Jojo Nones manipud iti panakaibaludna iti senado idi kalman kalpasan a pinirmaan ni Senate President Francis Chiz Escudero ti release order daytoy.
Maipalagip a ni Nones ket maysa kadagiti independent contractor nga inreklamo ti aktor a ni Sandro Muhlach iti kaso a panagrames.
Naibalud ni Nones idi Agosto 19 gapu iti saanna a panagsungbat kadagiti damag ni Senator Jinggoy Estrada iti maipatpatungpal a hearing ti Senate Committee on Public Information and Mass Media maipapan iti harrassment a kasangsango daytoy.
Sigun kenni Estrada, nagsurat ni Nones kenkuana ken ditoy a nagkiddaw iti dispensa ken inlawlawag ni Nones a gapu iti anxiety ken stress ket saanna a naiyebkas ti kapanunotanna iti dayta a panawen.
Gapu iti dayta, nagsurat ni Estrada kenni Senator Robin Padilla ken ditoy nga impakaamona a saan daytoy a kumontra nu maikkat ti detention kenni Nones.
