BAGUIO CITY – Indeklara ti lokal a gobyerno ti Baguio a ‘persona non grata’ ditoy siudad ni Cabanatuan Judge Nelson V. Largo.
Iti sesyon ti konseho, nagnunumuan dagiti opisyal ti siudad ti panakaideklara ni Largo a ‘persona non grata’ ditoy Baguio gapu iti nagbalin nga unacceptable behavior daytoy.
Maipalagip nga impaulog ni Largo ti subpoena kadagiti traffic enforcers ti POSD ken BCPO a nangbaklas iti plaka ti luganna kalpasan nga iligal a nagparada sadiay Kayang Street idi napalabas a bulan.
Binukel ti konseho ti Resolution No. 429, series of 2019 para iti nasao a deklarasyon kas maitunos metlaeng iti kiddaw ni Mayor Benjie Magalong.
Inladawan ti mayor nga arogante ken unprofessional ti inaramid ti nasao nga ukom a nangidadanes kadagiti mangiyim-implementar iti linteg.
Maipalagip a dua ti panaglabsing a naaramidan ni Judge Lago partikular ti iligal a panagparada ken ti panaglabsing iti number coding ordinance ti siudad.
Nagresulta daytoy iti panakaipaay ti dua a citation ticket iti nasao nga ukom ngem kalpasan ti panaglabsingna ket nangipaulog daytoy iti subpoena kadagiti nangsitar kenkuana a traffic enforcers ken imbilinna ti panagparang dagitoy iti korte a pagserserbianna sadiay Cabanatuan inton Nobyembre 29.
Gapu iti daytoy, kinnidaw ti mayor ti tulong ni Chief Justice Diosdado Peralta iti panangilinteg ti Korte Suprema iti nasao a panagabuso ti ukom.
Inkalintegan met dagiti na-subpeona-an a traffic enforcers nga impatungpalda laeng ti linteg trapiko ti Baguio City.
