Napilaan ti kaso a syndicated estafa dagiti lider ken operator ti junket scam group a Team Z.
Daytoy ket iti bileg ti resolusyon nga impaiyulog ti Baguio City Prosecutors Office babaen iti rekomendasyon ti National Bureau of Investigation-Cordillera.
Maibasar iti report, nangrugi nga inimbestigaran dagiti kameng ti National Bureau of Investigation-Cordillera ti nasao a grupo dagiti scammers idi Setyembre tawen 2022 kasaruno ti naawat dagitoy a nasurok tallo gasut (300) a reklamo manipod kadagiti investors.
Nagbalin a wagas dagiti akusado ti panangidiayada kadagiti nagbalin nga investorsda ti 5%monthly income manipod iti investment dagitoy a sigun kadakuada ket malock-in iti las-od ti maysa a tawen.
Nupay kasta, naitantantan wenno saanen a nakaaw-awat pay dagiti investors ti returns manipod iti investmentda ken natakwatan a saan nga otorisado ti Team Z nga agpataray ti casino junket.
Sumagmamano kadagiti investors ket nakaipaayen ti saan a bumaba iti Php1million a gatad ti investmet.
Sigun iti imbestigasyon, natakwatan a dumanun iti sangapulo a ribo(10k) nga investors ti naalilaw ti nasao a grupo dagiti scammers nu sadino, naitaray manipod kadakuada ti nasurok Php4.5billion.
