Pinilaan ni Atty.Ferdinand Topacio ni Justice Secretary Jesus Crispin Remulla iti reklamo idi laeng kalman iti Office of the Ombudsman.
Ti naipila nga arbitrary detention ken graft complaints kontra kenni Remulla ket mainaig iti panakaarestar da Shiela Guo ken Cassandra Li Ong idi napan a tawen.
Sigun kenni Atty. Topacio, ti panakaarestar da Guo ken Ong idiay Indonesia ken ti panangibalud iti National Bureau of Investigation kadakuada iti uppat nga aldaw ket maysa a panaglabsing iti paglintegan gapu ta dagitoy ket awanan iti warrant of arrest.
Iti nasao a reklamo, inraman metlaeng ni Atty. Topacio ni NBI Director Jaime Santiago gapu ta patienna a dagiti kameng iti NBI a nangarestar kadagiti nasao a POGO personalities ket awanan iti personal knowledge a nangaramid dagiti inarestarda iti krimen.
Malaksid iti dayta, patien ni Atty. Topacio a dagiti inakusaranna nga opisyales ket naglabsing metlaeng iti Anti-Graft and Corrupt Practices Act.
Nupay kasta, ilawlawag daytoy a ti panangipilana iti kaso ket saan a tapno mangharass wenno mangpataud iti unnecessary delay.
