BAGUIO CITY – Naisayangkat ti panagsukimat kadagiti bagahe kadagiti bus terminals iti siudad ti Baguio babaen iti K-9 units ti pulisya ken PDEA.
Sigun kenni Pol. Lt. Jeffrey Cabinto, team leader ti nasao nga K9 unit, daytoy ket tapno maipasigurado ti kinatalged dagiti agturong iti terminal pakairamanan dagiti staff sadiay.
Kinunana a nagaramat ti PDEA iti K9-Narcotics Detection Dog a nangsukimat kadagiti package ken llugan tapno maamwan no adda ti presentia ti iligal a droga.
Inayonna a nagaramat metlaeng dagitoy iti K9- EDD wenno Explosive Detection Dog a nangsukimat kadagiti posible a pampabettak a naimuntar iti terminal.
Malaksid iti daytoy, adda ti K9-Search and Rescue dog ken Combat Tracker Dog a maar-amarat kadagiti dadduma nga operasion dagitoy.
Impetteng pay ni Cabinto nga awan ti nawanawananda a pangta iti seguridad kabayatan ti inspeksion.
Nupay kasta, puntiryada a mamintinir daytoy babaen iti agtultuloy a panangipatungpalda iti kapada nga aktibidad kadagiti nagduduma a terminals, sementeryo ken iti merkado publiko ditoy siudad ti Baguio.
