BAGUIO CITY – Maiyap-apela manen ti panagbiruk dagiti amin nga agap-aplikar ti building permit ditoy siudad ti Baguio iti espasyo nga agserbi a paradaan dagiti agbalin a kustomer dagitoy.
Kasaruno daytoy ti reklamo ti maysa a residente ti New Lucban Barangay seknan iti locational clearance daytoy a nakapila iti City Planning and Development Office, no sadino, kasapulan ti nasao a sertipikasyon sakbay a makaala ti building permit iti City Buildings and Architecture Office.
Inlawlawag ni City Planning and Development Coordinator Architect Donna Tabangin a probisyon ti National Building Code of the Philippines ken ti zoning ordinance ti Baguio ti maikalkalikagum a kaadda ti agserbi a paradaan ti maysa nga establishimento.
Dinakamatna a no awan ti espasyo iti sangwanan ti pasdek ket nasken nga agbiruk ti maseknan iti espasyo iti uneg ti 200 metro manipud iti pasdekna a mabalin a maaramat a paradaan.
Insingasing met ti lokal a konseho ti panakinegosasyon dagiti building owners kadagiti barangay officials para iti panakabigbig ti agserbi a paradaanda iti masakupan ti barangay wenno umapelada kadagiti dadduma a residente tapnu maki-aramatda iti paradaan dagitoy.
Inyunay-unay pay ni Architect Tabangin a ti panakaipaay ti exemption wenno panakailaksid kadagiti building permit applicants ket mangitunda laeng iti dakdakkel a parikut iti benneg ti urban planning.
