BAGUIO CITY – Nainget ti panagwanawan ti DSWD-Cordillera iti sasaaden ti panawen iti pagilian kas paset ti panagsaganada iti aniaman a sumangbay a bagyo.
Iti interview ti Bombo Radyo Baguio, kinuna ni DSWD-Cordillera regional director Leo Quintilla, adda ti nakasagan a nasurok 14,300 a family food packs, malaksid kadagiti sleeping tents ken hygiene kits a maiwaras kadagiti nagduduma a probinsia nga agkasapulan kadagitoy.
Kinunana nga agtultuloy ti panagwanawanda kadagiti sasaaden dagiti lugar iti probinsia tapnu maipanamnama nga adda ti nakasagana ken umdas a tulong a maipaay.
Innayonna a manarimaan ti produksion kadagiti relief commodities iti nagduduma a production hub ti ahensia ditoy rehion.
Maibasar iti kaudian a datus ti DSWD-Cordillera, lima a probinsia iti rehion Cordillera ti naapektaran iti panagdalapos ti bagyo a Rolly.
Dumanonen iti 119 a pamilya wenno 451 nga indibidual manipud iti walo a barangay ti naapektaran iti napalabas a bagyo nupay nakaawiden dagiti naapektaran a pamilya a nagkamang kadagiti evacuation centers.
