BAGUIO CITY – Ngimmato iti innem agginga walo a porsiento ti tonelada ti basura a nakolektar ti General Services Office (GSO) ti siudad ti Baguio ita a holiday season.
Sigun kenni GSO – Solid Waste Management Division Chief Dominador Urbanozo, gtapu daytoy iti panagado dagiti turista ditoy siudad.
Kinunana a manamnama pay a ngumato ti kaadu dagiti makolektar a basura ditoy siudad kagiddan ti panagleppas ti agdama a tawen.
Innayonna a sigud ket 122 a tonelada ti basura ti makolkolektarda iti aglawlaw ti siudad manipud kadagiti 422 a waste generation areas.
Dinakamatna a kaaduan kadagiti basura a nakolektarda manipud iti nagduduma nga establishimiento, parke ken barangay iti siudad ket dagiti mabalin a mairesiklo ken dagiti maibilbilang a residual wastes.
Umap-apela pay daytoy iti publiko para iti panakitinnulongda iti lokal a gobierno babaen iti panangibelleng dagitoy iti basurada iti umno a basuraan.
