BAGUIO CITY – Agtultuloy latta ti panagraira ti nagduduma a modus ti online scam a pakabikbiktimaan dagiti umili, nangruna dagiti agar-aramat ti social media.
Sigun kenni PCol. Tirso Manoli, dadaulo ti Regional Anti-Cybercrime Unit-Cordillera, dumanonen iti 19 a cybercrime ti naikamang iti opisinada manipud idi Enero agingga idi Hulyo ti agdama a tawen ken kaaduan kadagiti nasao a kaso ket online scam.
Kinunana a kadawyan a modus dagiti online scammers ket ti panangbiktimada kadagiti babbai babaen iti panakirelasyonda kadagitoy iti online agingga a maalada ti panagtalek ti biktimada ken sadiay nga isayangkatda ti pudno a gagarada.
Innayonna nga adu metten dagiti mabikbiktima iti online shopping, no sadino, agbayad dagiti biktima iti dakkel a kantidad ngem saandna a maala ti produkto a binayadanda bayat a ti dadduma ket naiduma a produkto ti maawatda.
Sigun pay kenkuana, adda metlaeng dagiti mailislistada nga online libel, love scam, online estafa, online threat, package Scam ken dadduma pay ken kaaduan kadagiti mabikbiktima iti rehion ket dagiti residente iti Baguio City ken Benguet.
Dinakamat ni Col. Manoli nga adda latta dagiti mabikbiktima iti online scam gapu iti kinakurang ti panaka-ammo dagiti netizens, nangruna dagiti nalaka a maawis kadagiti makitkitada iti social media.
Gapu iti daytoy, ibalbalakadna manen ti panagbalin a nasirib dagiti umili iti panagaramatda iti social media ken ti panagbalin dagitoy a naridam manipud kadagiti panag-allilaw tapnu saanda a mabiktima iti aniaman nga scam babaen iti online.
