Dakkel ti mapukpukaw a pammastrekan iti maysa nga aldaw dagiti agbibiahe a jeep a 30 litro ti makonkonsumoda iti maysa nga aldaw.
Daytoy ti impetteng ni Mike Cabangon, pannakangiwat iti PISTON Cordillera.
Iti pannakiuman ti Bombo Radyo, kinunana nga agrekreklamo ti kaaduan a transport sector gapu iti panagngato iti presio iti krudo.
Iti tengnga ti panagkiddawda iti kanayunan a P2 idi napalpalabas, a nabayaga nga ipukpukkawda iti gobierno, kinunana a saanen nga umanay daytoy para iti pagimbaganda gapu iti panagngato iti krudo.
Impettengna met a saan a solusion ti ayuda nga ipapaay iti gobierno kalpasan nga inwaragawag ni President Ferdinand Marcos Jr., a mangipaay iti maseknan nga ahensia iti fuel subsidy. Nupay kasta, kinuna nga adda dagiti saan a maipapaayan iti ayuda kagiddan ti panangiyebkasna a saan nga amo ti gobierno ti pamay-anda a solusyon.
Para iti PISTON, kayatda laeng a maikkat wenno amyendaran ti Oil Deregulation Law, kagiddan ti panagikkat iti VAT ken excise tax.
Kabayatanna, kinumpirmar ni Cabangon a mangisayangkat ti National PISTON iti tigil-pasada kas protesta iti gobierno.
Inyebkas ni Cabangon nga agbalbalin nga awan serbina ti gobierno gaputa dagiti kangrunaan kuma nga iyaramidda ket saanda a maaramid.
Inlawlawagda a ti panangisayangkatda iti tiigil-pasada ket panangiduron iti gobierno nga agaramid iti napateg a solusion.
