BAGUIO CITY – Tinagiragsak ti Police Regional Office – Cordillera (PROCOR) ti kaawan ti nailistada a biktima ti stray bullet iti entero a rehion iti panakasarabo ti Baro a Tawen.
Sigun kenni PCI Carolina Lacuata, pannakangiwat ti PROCOR, maysa laeng ti nailista a kaso ti indiscriminate firing a napasamak iti rehion kabayatan ti Paskua ken Baro a Tawen.
Kinunana a napasamak ti nasao nga insidente sadiay Villaviciosa, Abra ngem dagus met laeng a nakemmeg ti suspek ken awan ti nadangran iti daytoy.
Innayonna nga agtultuloy latta ti panagmonitorda ngem namnamaen ti PROCOR a saanen a manayonan ti maysa a kaso ti indiscriminate firing a nailista iti rehion.
Maipalagip nga iti panakasarabo ti tawen 2017 ket nakalista ti PROCOR iti tallo a kaso ti indiscriminate firing iti entero a rehion Cordillera.
