BAGUIO CITY – Awan ti aniaman a nagbalin nga akem wenno koneksion ti National Bureau of Investigation (NBI) – Cordillera iti maatap a pwersado a panag-take-over iti headquarters ti Benguet Electric Cooperative (BENECO) sadiay South Drive ditoy siudad ti Baguio.
Impetteng daytoy ni Atty. Hector Eduard Geologo, regional director ti NBI-Cordillera iti interview ti Bombo Radyo Baguio.
Naamuan a pinaayaban ti dua a konseho ti NBI tapnu agpalawag iti maatap a presensiada iti maibagbaga a pwersado a panangserrek dagiti pulis a dinutukan ti National Electrification Administration iti headquarters ti BENECO.
Kinunana nga inyunay-unayda iti sungbatda a naipatulod babaen iti surat iti provincial board ti Benguet ken iti city council ti Baguio ti kaawan ti akem wenno partisipasyonda iti nasao nga insidente idi parbangon ti October 18.
inyunay-unayna nga awan ti aniaman a panaka-ammoda iti nasao nga insidente gaputa aggaraw laeng dagiti agents ti NBI no adda ti maawatda a pammilin manipud iti central headquarters ti ahensia wenno iti Department of Justice. (report ni Bombo Razced Pagoli)
