BAGUIO CITY – Naamuan a cardiac arrest secondary to internal hemorrhage ti initial findings iti ipupusay ti maysa a kadete ti Philippine Military Academy (PMA) kalpasan a nagbakbakwar iti uneg ti barracks dagitoy sadiay Fort Del Pilar, Baguio City idi parbangon kalman.
Nabigbig daytoy a ni Cadet 4CL Darwin Dormitorio, 20-anyos, manipud Cagayan De Oro City ken adda iti sidong ti Echo Company.
Maibasar iti report, nagbakbakwar ti kadete bayat nga adda daytoy iti uneg ti barracks-da kagiddan ti panagreklamona iti panagsakit ti tiyanna.
Naiturong daytoy iti PMA Station Hospital pasado alas-4 ti parbangon para iti panakatamingna ngem iti alas-5:15 ti agsapa ket naideklara a pimmusay ni Cadet Dormitorio babaen kenni Captain Florence Apple Apostol, MD.
Kagiddan iti daytoy, impeksa ti PMA ti panakipagladingitda iti Pamilya Dormitorio ken ti agtultuloy nga imbestigasyon iti napasamak iti kadete.
Impasigurado pay ti PMA iti publiko a kanayon ken sistematiko nga ikonkonsiderada ti pakabuklan a pagsayaatan ti tunggal kadete iti amin nga aspeto ti edukasyon ken panagsanayda.
Ti PMA ti primary training ken educational institution ti Armed Forces of the Philippines. (-edited)
