Nakapreposition itan dagiti maaramat a kagawaan para iti panagresponde dagiti kameng iti Disaster Risk Reduction and Management Office iti Baguio para iti panagdalapos ti tropical storm a ni Kristine.
Iti panakiuman ti Bombo Radyo kenni Engineer Charles Carame, opisyal manipod iti City Disaster Risk Reduction and Management Office-Baguio, imbinglayna nga halos amin a babbarangay iti Baguio City ket addaanen kadagiti kaskenan a kagawaan para iti panagrespondeda nu sadino, nakafull alert dagitoyen.
Nupay kasta,mapalpalagipan latta dagiti maseknan nga opisyales iti tunggal barangay a dagus nga ipakaammoda nu agkurkurang ti kagawaan nga aramatenda para iti panagresponde tapno dagus a makiddaw ti panakaipaay daytoy manipod iti gobyerno.
Innayon ni Engr. Carame a sigun iti obserbasyonda, nasayaat ken napartak ti panagresponde dagiti kameng iti Barangay Disaster Risk Reduction and Management Committee kadagiti masakupanda.
Mainaig iti dayta, kinuna ti opisyal nga iti 128 a babbarangay iti Baguio City, adda laengin iti dua wenno tallo a saan pay a nakaisumitir iti BDRRM Plansda.
Kabayatanna, maiyunay-unay met kadagiti responders a sakbayda nga umarayat, masapol a secured metlaeng dagitoy.//Bombo Rob Dominguez
