BAGUIO CITY – Immapela iti agtultuloy a kararag ken suporta ti maysa a kailian a soldado nga adda ita sadiay Marawi City.
Iti panakiuman ti Bombo Radyo kenni “Torogis” manipud iti Philippine Marines, kinunana a kasapulanda ti kararag ken suporta, saan laeng a dagiti soldado nu di ket agramanen dagiti pulis nga adda ita iti nasao a siudad.
Kinunana a nakaawid metten ti dadduma a kakadwa dagitoy ken manamnama a nu malpas ti clearing operation ket agsublida iti sigud a destino dagitoy.
Dinakamatna a manipud Sultan Kudarat ket naipatulodda sadiay Marawi kas kanayunan a pwersa ti gobyerno idi pay bulan ti Hunyo.
Imbinglayna met a saanda a ninamnama a bumayag ti giyera iti nasao a siudad.
Dinakamatna a nagasat daytoy kalpasan a namintallo a nakalisi iti peggad.
Kinunana a gistayan daytoy a napuntaan iti bala, nabarsakan daytoy iti granada ken natinnagan iti mortar ngem saan daytoy a naan-ano gapu iti napartak nga aksyon daytoy.
Ni “Torogis” ket maysa a marine leutenant, manipud iti siudad ti Baguio, sangapulo a tawennan iti serbisyo, ken nagturpos iti Philippine Military Academy.
