BAGUIO CITY – Nasarakan ti kaipaspasngay a maladaga a naibelleng iti maysa a kanal sadiay Purok 3, Irisan Baguio City idi malem kalman.
Sigun kenni PCI Pablo Emmanuel Nead, dadaulo ti Station 9 ti Baguio City PNP, 9, naakawatda iti tawag mainaig iti panakaibelleng ti maysa a maladaga iti maysa a kanal iti nasao a lugar.
Kinunana a dua a testigo ti mismo a nakakita iti panangibelleng iti maysa a babai iti nasao a maladaga.
Insalaysay dagiti testigo a sakbay nga imbarsak ti nasao a babbai iti kanal ti malagada ket imbaotna pay daytoy iti kongkreto a pader.
Iti panagresponde dagiti pulis, nakitada ti maladaga a naibungon iti supot ken impagaropda a pimmusayen ti maladaga.
Nupay kasta, idi alaenda ti maladaga ket nagsangit daytoy isut gapuna a dagus nga intarayda iti pagagasan nga ita ket agtaltalinaed iti Intensive Care Unit ti Baguio General Hospital and Medical Center.
Naduktalan iti kanayonan nga imbestigasyon ti pulisya nga uppat nga indibidual ti maitudtudo a suspek manipud maysa a boarding house nga insuro dagiti testigo a nagtaudan ti babai a nangibelleng iti maladaga.
Karaman kadagiti im-imbestigaran dagiti pulis ti agpadpadara a babai a mapapati nga ina ti maladaga ken ti maysa a lalaki nga adda iti nasao met laeng a boarding house a posible met nga ama ti nasarakan a maladaga.
